Finansiell rapportering
Sist publisert: 13. juni 2025
I 2024 prioriterte Finanstilsynet å kontrollere korleis føretaka rapporterer om klimarelaterte og makroøkonomisk forhold i årsrekneskapen. For kontroll av berekraftsrapporteringa var taksonomirapporteringa eit sentralt område. Finanstilsynet sin kontroll avdekte fleire svakheiter i rapporteringa.
Fakta om finansiell rapportering
Finanstilsynet fører kontroll med den finansielle rapporteringa til utskrivarar av omsettelege verdipapir som er, eller blir søkt tatt opp til handel på ein regulert marknad i EØS, og som har Noreg som heimstat. Kontrollen omfattar rekneskapsrapportering og berekraftsrapportering.
Ved utgangen av 2024 var 277 føretak omfatta av kontrollen med finansiell rapportering. Av desse var 36 utanlandske. 210 føretak var utskrivarar av aksjar eller eigenkapitalbevis. 47 utskrivarar av aksjar eller eigenkapitalbevis skreiv òg ut obligasjonar som var noterte på Oslo Børs. Ved utgangen av 2024 var det 67 utskrivarar med berre obligasjonar noterte på Oslo Børs. I løpet av året blei det notert 11 aksje- og eigenkapitalutskrivarar på Oslo Børs, mens 14 aksjeutskrivarar blei strokne.
Kontroll med finansiell rapportering i 2024
I 2024 prioriterte Finanstilsynet blant anna å kontrollere korleis føretaka rapporterer om klimarelaterte og makroøkonomiske forhold i årsrekneskapen. For kontroll av berekraftsrapporteringa var taksonomirapporteringa eit sentralt område.
Finanstilsynet vel ut kva føretak vi skal kontrollere på bakgrunn av signal, risikovurderingar eller om det er lenge sidan sist eit føretak blei kontrollert. Risikovurderinga bygger blant anna på innrapportering av opplysingar frå føretaka.
Kontrollaktivitetar
I 2024 gjekk Finanstilsynet gjennom heile eller delar av års- eller delårsrekneskapen til 25 føretak. Kontrollen retta seg særleg mot utskrivarar av aksjar og eigenkapitalbevis, men også mot enkelte utskrivarar av obligasjonar. Tilsynet hadde tettare oppfølging av elleve føretak. Ti av desse sakene er framleis under arbeid. I tillegg avslutta tilsynet seks saker frå tidlegare år.
Finanstilsynet kontrollerte 15 ikkje-finansielle føretak si taksonomirapportering for 2023 og gjorde ein overordna gjennomgang av alle dei ikkje-finansielle føretaka som var omfatta av regelverket per 31. desember 2023.
Alle tilsynsrapportar og vedtak er publiserte på nettstaden til Finanstilsynet.
Andre forvaltingssaker
Finanstilsynet gav straffegebyr til fire føretak i 2024 for forseinka offentleggjering av årsrapportar.
Finanstilsynet publiserte i oktober 2024 ei oversikt over manglar i årsrapportane for noterte føretak for rekneskapsåret 2023. Dette gjaldt blant anna manglande ansvarserklæring, manglande forklaring for føretaksstyring og feil i samsvar med krava til elektronisk rapporteringsformat (ESEF).
Færre føretak hadde manglar i årsrapporten for 2023 etter innhaldskrava samanlikna med årsrapporten for 2022. Finanstilsynet noterer seg at det framleis er eit behov for at føretaka set seg godt inn i formkrava til elektronisk rapporteringsformat, blant anna krava til merking av IFRS-konsernrekneskapen.
Regelverksarbeid
Finansdepartementet vedtok i 2022 å delegere myndigheit til Finanstilsynet til å fastsette forskrifta om forenkla IFRS. Finanstilsynet sende i 2024 eit forslag til enkelte endringar og klargjeringar på høyring, inkludert verkeområdet til forskrifta. Endringane blei etter høyringa fastsette av Finanstilsynet i desember. Finanstilsynet utarbeidde òg forslag til forskriftsendringar som følge av endringar i rekneskapslova om berekraftsrapportering som Finansdepartementet har sendt på høyring.