Finanstilsynet åtvarar mot tenester frå Wizbank
Sist publisert: 5. april 2022
Finanstilsynet er gjort merksam på ei internettside der det går fram at eit føretak med namnet Wizbank driv bankverksemd, og at dette føretaket har adresse i Noreg. Wizbank har ikkje løyve til å drive bankverksemd i Noreg, og Finanstilsynet åtvarar mot eventuelle tilbod som blir marknadsførte via nettsida.
Nettsida (wizbank.co) framstår som enkel og uprofesjonell, og det er grunn til å tru at det er svindel. Det er ikkje registrert noko føretak med namnet Wizbank i Finanstilsynet sitt verksemdregister.
Finanstilsynets register inneheld informasjon om alle føretak som har løyve til å tilby investeringstenester i Noreg. På nettstaden til Finanstilsynet er det òg ei liste (ikkje fullstendig) over aktørar i marknaden som opererer utan løyve.
Marknadsåtvaringar / investeringsbedrageri
Finanstilsynet får ofte førespurnader frå enkeltpersonar som har blitt tilbode aksjar, fondsdelar, CFD-ar og andre investeringsmoglegheiter per telefon, e-post eller post. Tilboda kjem frå seljarar som dei ikkje kjenner frå før, som ofte kallar seg «rådgivarar» eller «meklarar». Dette er svært ofte reine svindelforsøk.