Casa Concept Real Estate S.L.
Sist publisert: 28. juni 2022
Finanstilsynet gjer merksam på at det spanskregistrerte føretaket Casa Concept Real Estate S.L. ved merkenamnet CasaConcept ikkje har løyve til å drive verksemd etter norsk lov om eiendomsmegling.
Finanstilsynet har motteke opplysningar om at CasaConcept marknadsfører sal av eigedom i Spania til norske kjøparar. Føretaket tilbyr òg tenester og presenterer seg på norsk frå nettsida www.casaconcept.net.
Finanstilsynet gjer merksam på at CasaConcept ikkje har løyve frå Finanstilsynet som norsk eigedomsmeklingsføretak etter lov om eiendomsmegling. Dette inneber at Finanstilsynet ikkje har tilsyn med føretaket eller tenestene føretaket tilbyr. Finanstilsynet tilrår både kjøparar og seljarar av eigedommar som blir formidla av føretaket, å innhente nødvendig informasjon om relevant lokalt regelverk og føretaket sitt ansvar og rolle i eigedomshandelen, før dei inngår avtale med eller gjennom føretaket.
Finanstilsynet sitt verksemdsregister inneheld informasjon om alle eigedomsmeklingsføretaka som har løyve til å drive eigedomsmekling i medhald av eigedomsmeklingslova i Noreg.
Marknadsåtvaringar / investeringsbedrageri
Finanstilsynet får ofte førespurnader frå enkeltpersonar som har blitt tilbode aksjar, fondsdelar, CFD-ar og andre investeringsmoglegheiter per telefon, e-post eller post. Tilboda kjem frå seljarar som dei ikkje kjenner frå før, som ofte kallar seg «rådgivarar» eller «meklarar». Dette er svært ofte reine svindelforsøk.