Finanstilsynet åtvarar mot tenester frå Nordic Cloud Bank
Sist publisert: 5. november 2021
Finanstilsynet er gjort merksam på ei internettside der det går fram at eit føretak med namnet Nordic Cloud Bank driv bankverksemd i Noreg via det dei kallar eit 'outreach office' i Noreg. Nordic Cloud Bank har ikkje løyve til å drive bankverksemd i Noreg, og Finanstilsynet åtvarar mot eventuelle tilbod som blir marknadsførte via nettsida.
Nettsida (nordiccloudbank.com) framstår som svært uprofesjonell, og det er grunn til å tru at det er svindel. Det er ikkje registrert noko føretak med namnet Nordic Cloud Bank i Finanstilsynet sitt verksemdregister.
Finanstilsynets register inneheld informasjon om alle føretak som har løyve til å tilby investeringstenester i Noreg. På nettstaden til Finanstilsynet er det òg ei liste (ikkje fullstendig) over aktørar i marknaden som opererer utan løyve.
Marknadsåtvaringar / investeringsbedrageri
Finanstilsynet får ofte førespurnader frå enkeltpersonar som har blitt tilbode aksjar, fondsdelar, CFD-ar og andre investeringsmoglegheiter per telefon, e-post eller post. Tilboda kjem frå seljarar som dei ikkje kjenner frå før, som ofte kallar seg «rådgivarar» eller «meklarar». Dette er svært ofte reine svindelforsøk.