Klimarisiko i norske bankar

Finanstilsynet har analysert to moglege utviklingsbaner for norsk økonomi med utgangspunkt i klimascenario frå Network for Greening the Financial System (NGFS) og Bank of England.

I den eine utviklingsbana startar omstillinga til eit lågutsleppssamfunn umiddelbart og skjer utan store realøkonomiske kostnader. I eit alternativt scenario startar omstillinga seinare og er prega av brå og uordna overgang både i Noreg og internasjonalt. Det aukar risikoen for feilinvesteringar og for verdifall på eksisterande produksjonsutstyr. Finanstilsynet sine berekningar indikerer at i eit slikt scenario vil tapa til norske bankar på utlån til bedrifter bli betydelege. Dei berekna tapa blir likevel vurderte å vere handterbare.