Kartlegging av forsikringsføretaka sin bruk av avansert teknologi

Om rapporten

Den teknologiske utviklinga går raskt, og forsikringsføretaka bruker i aukande grad avanserte analysemetodar, for eksempel basert på kunstig intelligens (KI), i ulike delar av verksemda. For å få betre kunnskap om forsikringsføretaka sin bruk av avansert teknologi har Finanstilsynet kartlagt dette hos totalt 31 forsikringsføretak. 

Føretaka blei bedne om å gjere greie for bruken av avansert teknologi (bruksområde, type teknologi, formål og kor lenge teknologien har vore i bruk), kompetanse på ulike nivå i styre og administrasjon og dessutan korleis utviklinga og bruken av avansert teknologi er integrerte i systemet for styring og kontroll i føretaket, organisering av utvikling, bruk og vedlikehald av avansert teknologi, inkludert eventuell utkontraktering og bruk av konsulentar. Vidare blei føretaka bedne om å gjere greie for korleis dei varetek etikk, forklarbarheit og openheit, IKT-sikkerheit og robustheit, datakvalitet og personvern.

Av dei 31 forsikringsføretaka som er omfatta av kartlegginga, oppgav tolv føretak at dei bruker lite eller ingen avansert teknologi. Desse føretaka har òg få planar om å bruke slik teknologi i næraste framtid. I tillegg er det om lag fem føretak som nyttar avansert teknologi berre til enkle prosessar for å effektivisere og automatisere verksemda. Åtte av føretaka i kartlegginga oppgir omfattande bruk av avansert teknologi, og desse føretaka bruker teknologien i heile eller delar av verdikjeda. Dei har òg meir omfattande planar om bruk i åra som kjem.

Finanstilsynet sine forventingar

Finanstilsynet legg til grunn at forsikringsføretak som nyttar avanserte analysemetodar, etterlever det gjeldande sektorregelverket og andre krav, retningslinjer og oppfordringar som er relevante for denne aktiviteten.

Finanstilsynet forventar at føretaka etterlever prinsipp om forsvarleg styring og kontroll, og legg generelt til grunn at alle risikoane i føretaket er styrte.

Føretaka bør sikre tilstrekkeleg grad av menneskeleg tilsyn med systema, prosessane og resultata. Føretaka bør vidare gjennomføre regelmessige revisjonar for å sikre at systema fungerer etter hensikta og samsvarer med det gjeldande regelverket.

Bruken av avanserte analysemetodar med auka antal forklaringsvariablar kan gi meir nøyaktig klassifisering av risikodekningar og slik sett bidra til at premiane til føretaket står i forhold til den risikoen som blir overteken. Det er viktig at føretaka sikrar risikoutjamning mellom medlemmene i eit forsikringskollektiv, og tek omsyn til finansiell inkludering. Finanstilsynet legg vidare til grunn at føretaka ikkje utviklar ein praksis der prisen blir maksimert ut frå kor mykje kunden er villig til å betale for forsikringsproduktet. Finanstilsynet legg til grunn at føretaka sikrar transparens i prisinga, og at prisen kan forklarast for kunden.