Finanstilsynet sin årsrapport for 2022

Årsrapporten har seks kapittel som viser dei ulike sidene ved verksemda. Det første kapittelet, «Rapport frå leiinga», er signert av styreleiar Finn Arnesen og finanstilsynsdirektør Morten Baltzersen. Det mest omfattande kapittelet er «Årets aktivitetar og resultat». Her rapporterer tilsynet etter dei strategiske måla og styringsparametrane kva som var planlagde og gjennomførte oppgåver i det førre året. Dei andre kapitla omfattar «Introduksjon til verksemda og hovudtal», «Styring og kontroll i verksemda», «Vurdering av framtidsutsikter» og «Årsrekneskap».

Finanstilsynet si vurdering av framtidsutsiktene peikar særleg på risikoen for finansiell ustabilitet og at krigen i Ukraina, energikrisa, forstyrringar i forsyningskjedene og høg inflasjon bidreg til stor økonomisk og finansiell uvisse. Finanssektoren er òg prega av rask digitalisering, og den teknologiske utviklinga gir betydelege gevinstar for brukarane, finansføretaka og heile samfunnet, men medfører samstundes nye sårbarheiter. 

Riksrevisjonen si revisjonsmelding for Finanstilsynet vil vere klar i midten av mai og vil då bli publisert på finanstilsynet.no, saman med årsrapporten.

I februar publiserte Finanstilsynet meir omfattande rapportar om tilsynsverksemda i 2022 på alle dei ulike tilsynsområda.

• Rapporter fra tilsynsområdene for 2022