Publisert: 21. januar 2022
Sist endret: 25. januar 2022
Finanstilsynet rapporterer om sine observasjonar frå kontroll av prospekt og førespurnader til Finanstilsynet i 2021 i samband med utarbeiding av prospekt.
Finanstilsynet kontrollerer og godkjenner EØS-prospekt som gjeld offentlege tilbod av omsettelege verdipapir retta mot den norske marknaden og notering av omsettelege verdipapir på norsk regulert marknad.
Dei viktigaste observasjonane som Finanstilsynet informerer om i rapporten, er:
- Førespurnadene om prospekt er ofte ufullstendige eller prega av mangelfull kjennskap til regelverket eller mangelfulle førebuingar til prospektprosessen.
- Prospekta framstår ofte som ikkje tilstrekkeleg gjennomarbeidd ved innsending til Finanstilsynet.
- Det er ofte feil eller manglar i den finansielle informasjonen i prospekta. Dette gjeld særleg prospekt som inneheld kompleks eller proforma finansiell informasjon.
Finanstilsynet vil peike på at det er behov for ei vesentleg forbetring i kvaliteten i både prospekta som skal godkjennast, og også i øvrige førespurnader til Finanstilsynet. Den finansielle informasjonen i prospekta må oppfylle krava som blir stilte, og skal vere tilstrekkeleg gjennomarbeidd på førehand.