Årsmeldinga til Finanstilsynet for 2019

Meldinga frå leiinga er signert styreleiar Finn Arnesen og finanstilsynsdirektør Morten Baltzersen. Årsmeldinga inneheld ei oversikt over dei planlagde og gjennomførde oppgåvene i eit eige kapittel om rapportering av måloppnåing. Hovuddelen består av kapittel som rapporterer om tilsynet med dei ulike verksemdene og oppgåvene som Finanstilsynet gjennomførte i 2019. Dette omfattar stadlege tilsyn hos føretak, innrapportering frå verksemder, analysar av marknader, forvalting og regelverksutvikling. Utviklingsarbeidet i eiga verksemd er òg omtalt. Mellom anna fastsette Finanstilsynet ein digitaliseringsstrategi i desember 2019. Årsmeldinga inneheld faste, årlege rapportar om kvalitetskontroll frå Revisorforeningen og Regnskap Norge, som dei gjennomfører blant eigne medlemsverksemder.

Meir omfattande analysar og vurderingar av finansmarknaden blir dekte av den halvårlege rapporten Finansielt utsyn i juni og desember og i kvartalsvise soliditets- og resultatrapportar for finansføretak. I tillegg publiserer Finanstilsynet den årlege risiko- og sårbarheitsanalysen (ROS), som oppsummerer arbeidet med IKT-sikkerheit i finanssektoren i det førre året, og rapportar frå tematilsyn på dei ulike tilsynsområda.