Høyring frå EU-kommisjonen: Endring i delegert kommisjonsforordning om krav til likviditetsreserve (LCR) for kredittinstitusjonar

Etter EU-kommisjonens vurdering bidreg velfungerande marknader for verdipapirisering til auka økonomisk vekst, til finansieringar av EUs strategisk prioriteringar og til betre allokering av risiko. 

Sjølv om delegert kommisjonsforordning (EU) 2015/61 om krav til likviditetsreserve (LCR) for kredittinstitusjonar opnar for at verdipapiriseringar kan telje med som likvide eigedelar i kategorien Nivå 2b, viser undersøkingar at europeiske bankars likviditetsreservar i liten grad består av slike likvide eigedelar.

Vidare viser også konsekvensvurderingar av rammeverket for verdipapirisering, under dette av (EU) 2017/2401 (som endrar CRR) og verdipapiriseringsforordninga, (EU) 2017/2402, eit behov for revidering av delegert kommisjonsforordning (EU) 2015/61.

Dei foreslåtte endringane gjeld definisjonar av og avkortingssatsar for verdipapiriseringar i LCR, sjå (EU) 2015/61 artikkel 13. Ved dei foreslåtte endringane i artikkel 13 blir det opna for at Nivå 2b eigedelar i LCR skal kunne omfatte verdipapiriseringar med lågare risikoklasse (ECAI) enn i dag. Medan det i dag berre er risikoklasse 1 som kvalifiserer som Nivå 2b, opnar endringsforslaget for å ta med verdipapiriseringar til og med risikoklasse 7. 

Artikkel 13 (g) som dreier seg om kva som kan verdipapiriseres, er endra. Vidare er artikkel13 punkt 12 som set krav til  løpetida til verdipapiriseringa, stroke. 

Når det gjeld avkortingssats, blir han  endra til 15 prosent frå 25 prosent for verdipapiriseringar med risikoklasse 1 til 4 gitte visse vilkår, men blir behalde på 25 prosent for verdipapiriseringar som ikkje oppfyller desse. Verdipapiriseringar med risikoklasse 5 til 7 får ei avkorting på 50 prosent i LCR. 

Finanstilsynet reknar med at endringane i delegert kommisjonsforordning (EU) 2015/61 vil bli tekne inn i EØS-avtalen og gjennomførte i norsk rett ved inkorporasjon i § 2 andre ledd nr. 2 i CRR/CRD-forskrifta. 

Vi ber òg om at Finanstilsynet blir informert dersom det er forhold av særleg betydning for norske interesser som tilsynet bør vere merksam på. Det vil i utgangspunktet ikkje bli gjennomført ei ny høyring når regelverket skal gjennomførast inn i norsk rett.

Høyringsfristen er 15. juli 2025.

Les meir på nettstaden til kommisjonen:

• Amendments to the treatment of securitisation exposures under the Liquidity Coverage Ratio Delegated Regulation