Høyring frå EBA: Endringar i benchmarking av internmodellar i 2026

EBA gjennomfører årleg «EBA Benchmarking Exercise», der det blir samla inn data frå bankar som bruker internmodellar (IRB-modellar) for å berekne kapitalkrav. Desse dataa gjer det mogleg at tilsynsmyndigheitene kan samanlikne modellestimat mellom bankane («supervisory benchmarking»). Datainnsamlinga gjer det òg mogleg å overvake og forklare variasjonen i risikovekter for eigedelar over tid, samtidig som ho gir bankane informasjon som gjer dei i stand til å samanlikne eigne risikovurderingar med gjennomsnittet på nivåa til EU og enkeltland. 
For benchmark-undersøkinga i 2026 er desse endringane foreslått:

• For marknadsrisiko: Malar og instruksjonar for det nye rammeverket for den interne modelltilnærminga (IMA), som speglar endringane som blei innførte med FRTB (Fundamental Review of the Trading Book). 
• For kredittrisiko: Definisjonen av aktivaklassar blir tilpassa inndelinga av IRB-malar for kredittrisiko, slik han er vedtatt i dei reviderte gjennomføringsmessige tekniske standardane (ITS) for tilsynsrapportering. 

Datainnsamlinga er regulert gjennom ein teknisk standard (ITS), og det er endringar i denne standarden som no er på høyring.

Høyringsfristen til EBA er 26. mai 2025.

Høyringsnotatet er tilgjengeleg på nettstaden til EBA:

• Consultation on amending ITS on benchmarking exercises