Høyring frå ESMA: Nye og endra kommisjonsforordningar under MiFIR

Endringar i verdipapirmarknadsdirektivet (MiFID II) og verdipapirmarknadsforordninga (MiFIR) blei sluttførte ved Rådet sitt vedtak 20. februar 2024. Formålet med reglane er å forbetre likviditeten i marknaden og dermed lette selskap sin tilgang til finansiering frå kapitalmarknadene. Endringane tredde i kraft i EU 28. mars 2024. Det er per i dag ikkje klart når reglane vil tre i kraft i Noreg.

Endringane omfattar mellom anna vesentlege endringar i gjennomsiktigheit før og etter handelen for handelsplassar og systematiske internaliserarar (SI-ar), krav til finansielle instrument sine referansedata og meir detaljerte reglar for krava til marknadsdata som handelsplassar, godkjende offentleggjeringsordningar, CTP-ar og SI-ar forplikta til å publisere på "reasonable commercial basis".

ESMA har no utarbeidd forslag til endring av to kommisjonsforordningar og forslag til ei ny kommisjonsforordning som utfyller desse reglane. Dette gjeld endringar i kommisjonsforordninga om gjennomsiktigheit for obligasjonar, strukturerte produkt og utsleppsløyve (RTS 2), endringar i kommisjonsforordninga om referansedata (RTS 23) og forslag til ny kommisjonsforordning om "reasonable commercial basis".

Det er grunn til å tru at reglane blir tekne inn i EØS-avtalen og gjennomførte i norsk rett i verdipapirforskrifta.

Finanstilsynet ber om å bli informert dersom det er forhold av særleg tydning for norske interesser som Finanstilsynet bør vere merksam på i desse forslaga. Det vil i utgangspunktet ikkje bli gjennomført ny høyring når regelverket skal takast inn i norsk rett.

Høyringsfristen er 28. august 2024.

Les meir:

• MiFIR Review Consultation Package

Les også:

• MiFID II / MiFIR
• Endringer i MiFID II og MiFIR