Høyring frå ESMA: Mogleg endring av reglane om sanksjonsordninga i CSDR

CSDR (Central Securities Depositories Regulation) blei fastsett i EU i 2014, og utfyllande reglar om ei sanksjonsordning ved for seint oppgjorde transaksjonar blei fastsette i ei kommisjonsforordning som tok til å gjelde i 2022. Reglane er gjennomførde i norsk rett i verdipapirsentralforskrifta. ESMA har no sendt forslag til endring av reglane om sanksjonsordninga på høyring.

Formålet med høyringa er å innhente synspunkt og innspel frå partar som saka gjeld om kor effektiv den noverande sanksjonsordninga er for å forbetre oppgjersgraden. I tillegg ønsker ESMA synspunkt på forslaget om m.a. alternative metodar for å kalkulere gebyr for lovbrot.

Det er grunn til å tru at reglane blir tekne inn i EØS-avtalen og gjennomførde i norsk rett i verdipapirsentralforskrifta. Finanstilsynet ber om å bli informert dersom det er forhold av særleg tydning for norske interesser som tilsynet bør vere merksam på. Det vil i utgangspunktet ikkje bli gjennomført ny høyring når regelverket skal takast inn i norsk rett.

Høyringsfristen er 29. februar 2024.

Les meir på ESMAs nettsider:

• ESMA consults on potential changes to the CSDR penalty mechanism